वारंवार विचारले जाणारे प्रश्न (FAQ) –
CAMPA (Compensatory Afforestation Fund)
1. CAMPA म्हणजे काय?
CAMPA (Compensatory Afforestation Fund Management and Planning Authority) ही Compensatory Afforestation Fund Act, 2016 अंतर्गत स्थापन करण्यात आलेली वैधानिक यंत्रणा आहे. वनजमिनीचा बिगर-वन कारणांसाठी वापर झाल्यास प्रतिपूरक वनीकरणासाठी जमा होणाऱ्या निधीचे व्यवस्थापन आणि नियोजन करण्याचे काम CAMPA करते.
2. प्रतिपूरक वनीकरण (Compensatory Afforestation) म्हणजे काय?
वन (संवर्धन) कायद्यानुसार वनजमिनीचा बिगर-वन वापरासाठी वापर झाल्यास त्याच्या बदल्यात करण्यात येणाऱ्या वनीकरणाला प्रतिपूरक वनीकरण (Compensatory Afforestation) म्हणतात.
3. CAMPA चे प्रमुख उद्दिष्ट काय आहे?
प्रतिपूरक वनीकरण, पुनर्वनीकरण, नैसर्गिक वनांचे पुनर्स्थापन आणि जैवविविधतेचे संवर्धन करून पर्यावरणीय समतोल राखणे हे CAMPA चे प्रमुख उद्दिष्ट आहे.
4. CAMPA निधीचा वापर कोणत्या कामांसाठी केला जातो?
CAMPA निधीचा वापर प्रतिपूरक वनीकरण, अतिरिक्त वनीकरण, दंडात्मक वनीकरण, वन्यजीव व्यवस्थापन, पाणलोट क्षेत्र विकास (Catchment Area Treatment), मृदा व जलसंधारण, वन संरक्षण, नैसर्गिक पुनर्जनन, वन पायाभूत सुविधा आणि इतर अनुमत वनसंवर्धन कामांसाठी केला जातो.
5. CAMPA निधीचा वापर कोणत्या कामांसाठी करता येत नाही?
CAF Rules, 2018 नुसार CAMPA निधीचा वापर नियमित कर्मचाऱ्यांचे वेतन, परदेश दौरे, जमीन खरेदी, निवासी इमारती, कार्यालयीन फर्निचर, वाहन खरेदी, प्राणीसंग्रहालय किंवा सफारी विस्तार तसेच इतर शासकीय योजनांच्या अपूर्ण कामांसाठी करता येत नाही.
6. CAMPA ची रचना कशी आहे?
राष्ट्रीय CAMPA मध्ये Governing Body, Executive Committee आणि Monitoring Group असतात. प्रत्येक राज्य आणि केंद्रशासित प्रदेशात स्वतंत्र State CAMPA Authority कार्यरत असते.
7. CAF Act, 2016 चे मुख्य उद्दिष्ट काय आहे?
वनजमिनीच्या बिगर-वन वापरामुळे जमा होणारा प्रतिपूरक वनीकरण निधी योग्य प्रकारे व्यवस्थापित करून वनीकरण, वन संरक्षण, वन्यजीव संवर्धन आणि पर्यावरणीय विकासासाठी त्याचा प्रभावी वापर करणे हे CAF Act, 2016 चे मुख्य उद्दिष्ट आहे.
8. CAF Act, 2016 आणि CAF Rules, 2018 कधी लागू झाले?
Compensatory Afforestation Fund Act, 2016 ला 03 ऑगस्ट 2016 रोजी मंजुरी मिळाली. CAF Rules, 2018 हे 10 ऑगस्ट 2018 रोजी अधिसूचित करण्यात आले आणि 30 सप्टेंबर 2018 पासून कायदा व नियम अंमलात आले.
9. National CAMPA म्हणजे काय?
CAF Act, 2016 च्या कलम 8 अंतर्गत स्थापन करण्यात आलेली National Compensatory Afforestation Fund Management and Planning Authority ही राष्ट्रीय स्तरावरील सर्वोच्च प्राधिकरण आहे. ती राज्य CAMPA च्या कामांवर देखरेख ठेवते तसेच राष्ट्रीय स्तरावरील धोरणात्मक नियोजन करते.
10. 'User Agency' म्हणजे काय?
वनजमिनीचा बिगर-वन वापर करण्यासाठी परवानगी मागणारी कोणतीही व्यक्ती, कंपनी, संस्था किंवा केंद्र अथवा राज्य शासनाचा विभाग यांना User Agency म्हणतात.
11. Environmental Services म्हणजे काय?
वनांमधून मिळणाऱ्या पर्यावरणीय सेवांमध्ये लाकूड, गौण वनउत्पादने, चारा, पाणी, पर्यटन, वन्यजीव संरक्षण, कार्बन शोषण (Carbon Sequestration), पूर नियंत्रण, माती व पाण्याचे संवर्धन, जैवविविधतेचे संरक्षण आणि परिसंस्था सेवा यांचा समावेश होतो.
12. Annual Plan of Operation (APO) म्हणजे काय?
Annual Plan of Operation (APO) हा CAMPA अंतर्गत दरवर्षी तयार केला जाणारा अधिकृत कृती आराखडा आहे. यामध्ये मंजूर करण्यात येणारी कामे, खर्चाचा अंदाज, अंमलबजावणी करणारी संस्था, आर्थिक तरतूद, कालावधी आणि उद्दिष्टे यांचा समावेश असतो.
0 Comments